حکومت کسانوں کو فصل کے نقصان کا معاوضہ دے گی: یوگی آدتیہ ناتھ

لکھنؤ، 21 اگست۔ اتر پردیش کے وزیر اعلیٰ یوگی آدتیہ ناتھ نے ریاست میں بارش کی کمی کی وجہ سے کسانوں کو درپیش چیلنجوں کا جائزہ لیتے ہوئے یقین دہانی کرائی ہے کہ کسانوں کو فصل کے نقصان کا معاوضہ دیا جائے گا۔ انہوں نے کسانوں کو مکمل بجلی فراہم کرنے اور بقایا جات کی وجہ سے ان کے ٹیوب ویل کنکشن نہ کاٹنے کی بھی ہدایات دیں۔ ریاستی حکومت کے ایک ترجمان نے ہفتہ کو بتایا کہ وزیر اعلیٰ یوگی آدتیہ ناتھ نے ہفتہ کو ایک اعلیٰ سطحی میٹنگ میں ریاست میں مانسون اور فصل کی بوائی کی صورتحال کا جائزہ لیا اور کسانوں کے مفادات کے پیش نظر اہم ہدایات دیں۔ ہفتہ کو جاری ہونے والے ایک سرکاری بیان کے مطابق اس سال 20 اگست تک ریاست میں کل 284 ملی میٹر بارش ریکارڈ کی گئی ہے جو کہ سال 2021 میں 504.10 ملی میٹر اور سال 2020 میں 520.3 ملی میٹر سے کم ہے۔ بیان کے مطابق معمول کی بارشیں نہ ہونے سے خریف کی فصلوں کی بوائی متاثر ہوئی ہے۔ تاہم 19 جولائی کے بعد بارش کی صورتحال میں نمایاں بہتری آئی ہے۔ بیان کے مطابق اجلاس میں وزیر اعلیٰ نے کہا کہ کم بارشوں کی وجہ سے پیدا ہونے والے چیلنجوں کے درمیان ہر انناداتا کسان کے مفاد کا تحفظ کیا جائے گا اور کسانوں کی ہر ممکن مدد کی جائے گی۔ انہوں نے کہا کہ کسانوں کو کم بارشوں سے فصلوں کے نقصان کا معاوضہ دیا جائے گا۔ وزیراعلیٰ نے افسران کو ہدایت کی کہ اس سلسلے میں تمام آپشنز کو شامل کرتے ہوئے فوری طور پر بہتر ریلیف ایکشن پلان تیار کیا جائے۔ انہوں نے ریاست میں بارش کی صورتحال، فصل کی بوائی کی صحیح صورتحال کے بارے میں تفصیلی رپورٹ اگلے تین دنوں کے اندر حکومت ہند کو بھیجنے کی ہدایت کی۔ وزیراعلیٰ نے سیلاب کی صورتحال پر مسلسل نظر رکھنے اور ضروری تیاری کرنے کی بھی ہدایت کی۔