وزیر اعظم مودی کی قیادت میں ہندوستان عالمی رفتار بنانے والا بن گیا ہے: جیوترادتیہ سندھیا

نئی دہلی۔ شمال مشرقی خطہ کے مواصلات اور ترقی کے مرکزی وزیر، جیوترادتیہ سندھیا نے نئی دہلی کے یشوبومی میں منعقدہ انڈین موبائل کانگریس-2025 کے پہلے دن سیٹ کام سمٹ میں شرکت کی اور “عالمی رابطے کے لیے خلائی نیٹ ورکس” کے موضوع پر اپنے خیالات کا اظہار کیا۔ وزارت مواصلات کے زیر اہتمام اس تقریب میں دنیا بھر سے ماہرین نے شرکت کی۔ مرکزی وزیر نے کہا کہ وزیر اعظم مودی کی قیادت میں ہندوستان دنیا کی رفتار طے کر رہا ہے۔ سندھیا نے کہا کہ یہ کانفرنس صرف ایک اور ٹکنالوجی سمٹ نہیں ہے، بلکہ ایک نئے انقلاب کا آغاز ہے، ایک ایسا انقلاب جو آسمان میں شروع ہوتا ہے، سیٹلائٹ سے چلتا ہے، اور زمین پر انسانی زندگی کو بدل دیتا ہے۔ انہوں نے کہا کہ سیٹ کام صرف ٹیکنالوجی نہیں ہے، یہ ڈیجیٹل دور کا انصاف ہے۔ یہ انصاف ہے اس کسان کے لیے جو لداخ میں موسم کی تازہ ترین معلومات چاہتا ہے، اس ماہی گیر کے لیے جو لکشدیپ میں طوفان کی وارننگ سننا چاہتا ہے، اس بچے کے لیے جو چھتیس گڑھ کے ایک قبائلی گاؤں میں بہترین استاد سے سیکھنا چاہتا ہے، اور اس ڈاکٹر کے لیے جو سیلاب زدہ آسام میں مریضوں تک پہنچنا چاہتا ہے۔