اکھلیش یادو کا مرکز پر ایجنسیوں کے غلط استعمال کا الزام، ممتا بنرجی سے مل سکتی ہے۔

کولکتہ۔ سماج وادی پارٹی (ایس پی) کے صدر اکھلیش یادو نے جمعہ کو مرکز کی بھارتیہ جنتا پارٹی (بی جے پی) زیرقیادت حکومت پر اپوزیشن جماعتوں کے رہنماؤں اور عوامی نمائندوں کو ہراساں کرنے کے لیے مرکزی ایجنسیوں کا غلط استعمال کرنے کا الزام لگایا۔ اکھلیش یادو، جو ایس پی کی دو روزہ قومی ورکنگ کمیٹی کی میٹنگ کی صدارت کرنے کے لیے یہاں آئے ہیں، امکان ہے کہ جمعہ کی شام مغربی بنگال کی وزیر اعلیٰ اور ترنمول کانگریس کی صدر ممتا بنرجی سے ملاقات کریں گے۔ انہوں نے کولکاتہ ہوائی اڈے پر اترنے کے بعد نامہ نگاروں سے کہا، ”ای ڈی، سی بی آئی اور محکمہ انکم ٹیکس بی جے پی کے سیاسی ہتھیار ہیں۔ بنگال میں کیسز کم ہیں۔ اتر پردیش میں ہمارے بہت سے ایم ایل اے اور لیڈر جھوٹے اور من گھڑت کیسوں میں جیل میں ہیں۔ یادو نے کہا، ’’جو اپوزیشن لیڈر بی جے پی کو چیلنج کرتے ہیں، وہ انہیں ای ڈی اور سی بی آئی کے پاس بھیجتی ہے تاکہ انہیں ہراساں کیا جا سکے۔‘‘ ایس پی کی دو روزہ قومی ورکنگ کمیٹی اجلاس 18 مارچ سے کولکتہ میں ہوگا۔ پارٹی ذرائع نے بتایا کہ اس میں اس سال ہونے والے راجستھان، چھتیس گڑھ اور مدھیہ پردیش کے اسمبلی انتخابات اور 2024 میں ہونے والے لوک سبھا انتخابات کی حکمت عملی پر تبادلہ خیال کیا جائے گا۔ یادو آج مولالی یوا کیندر میں کارکنوں کی میٹنگ سے بھی خطاب کر سکتے ہیں۔ ذرائع کے مطابق وہ ان سے ملنے ممتا بنرجی کی رہائش گاہ بھی جائیں گے۔