گہلوت نے عوامی کاموں میں غیر ضروری تاخیر کرنے والے ملازمین کے خلاف کارروائی کرنے کی ہدایت دی۔

چیف منسٹر اشوک گہلوت نے منگل کو کہا کہ ریاستی حکومت شفاف، جوابدہ اور حساس گڈ گورننس کے ذریعے ہر طبقے کی بہتری کے لیے ترجیحی بنیادوں پر کام کر رہی ہے۔ انہوں نے کہا کہ ریاستی حکومت کی تمام اسکیموں پر بروقت اور موثر عمل آوری کو یقینی بنایا جائے، تاکہ عام آدمی کو ان کا بھرپور فائدہ مل سکے۔ اس تناظر میں انہوں نے افسران کو ہدایت کی کہ وہ ایسے ملازمین کے خلاف سخت کارروائی کریں جو عام لوگوں سے متعلق کاموں کو نمٹانے میں غیر ضروری تاخیر کا باعث بنتے ہیں۔ گہلوت منگل کو جے پور کے ہریش چندر ماتھر پبلک ٹریننگ انسٹی ٹیوٹ میں ریاستی حکومت کے ‘چنتن شیویر’ سے خطاب کر رہے تھے۔ وزیراعلیٰ نے کہا کہ تمام شہروں میں صفائی کے بہترین انتظامات کو یقینی بنانے کیلئے ضروری اقدامات کئے جائیں۔ گہلوت نے عہدیداروں سے کہا کہ وہ ملک میں صفائی میں سرفہرست شہروں کا مطالعہ کریں اور ہاؤسنگ اسکیموں کے نامکمل کاموں کو جلد از جلد مکمل کریں۔ انہوں نے کہا کہ راجستھان کے فن اور ثقافت کی پوری دنیا میں ایک منفرد شناخت ہے۔