این ڈی اے حکومت نے کرپوری ٹھاکر کو بھارت رتن دیا، ان کی پالیسیوں پر عمل کیا: سمرت چودھری

پٹنہ۔ نائب وزیر اعلیٰ سمرت چودھری نے کہا کہ جن سنگھ کے زمانے سے بی جے پی نے پسماندہ اور انتہائی پسماندہ طبقات کو ریزرویشن دینے کے کرپوری ٹھاکر کے فیصلے کی حمایت کی تھی اور وزیر اعظم نریندر مودی کی حکومت نے لیڈر کو بھارت رتن سے نوازا تھا۔ کرپوری ٹھاکر کے 101 ویں یوم پیدائش پر کل اپنے گاؤں میں منعقد پروگرام میں شرکت کرنے سے پہلے چودھری نے کہا کہ 1978 میں کرپوری ٹھاکر کی حکومت نے انتہائی پسماندہ طبقات کو 12 فیصد اور پسماندہ طبقات کو 8 فیصد ریزرویشن دیا تھا۔ کیلاش پتی مشرا، جن سنگھ (اب بی جے پی) کے ایک طاقتور رہنما، جو اس وقت حکومت کا حصہ تھے، نے کرپوری جی کی حمایت کی تھی۔ انہوں نے کہا کہ ریزرویشن پر جننائک کے کام کا کریڈٹ لینے کی کوشش کرنے والے لالو پرساد نے اپنے 15 سال کے دور اقتدار میں بغیر ریزرویشن کے پنچایتی انتخابات کرائے تھے، وہیں نتیش کمار نے پنچایتوں میں دلتوں، پسماندہ طبقات اور خواتین کو ریزرویشن دیا۔ اس وقت بھی بی جے پی حکومت میں تھی اور مرحوم سشیل کمار مودی نائب وزیر اعلیٰ تھے۔ نائب وزیر اعلیٰ چودھری نے کہا کہ بی جے پی اور این ڈی اے حکومت کرپوری جی کے نظریات پر عمل کرتی ہے، جب کہ اپوزیشن صرف ان کے نام پر سیاست کرتی ہے۔ نائب صدر جگدیپ دھنکھر اور نتیش کمار، وزیر اعلی، بہار، مرکزی زراعت اور دیہی ترقی کے وزیر شیوراج سنگھ چوہان کے ساتھ نائب وزیر اعلی سمرت چودھری سمستی پور میں کرپوری ٹھاکر کے گاؤں میں منعقد خصوصی پروگرام میں شرکت کریں گے۔