جھارکھنڈ میں اگلی حکومت ہیمنت سورین کی قیادت میں بنے گی: جے ایم ایم

جھارکھنڈ مکتی مورچہ (جے ایم ایم) نے جمعہ کے روز دعویٰ کیا کہ بھارتیہ جنتا پارٹی (بی جے پی) کی چالوں کے باوجود ریاست میں اگلی حکومت ہیمنت سورین کی قیادت میں بنے گی۔ جے ایم ایم کا بیان سابق وزیر اعلی چمپائی سورین کے رانچی میں ایک تقریب میں بی جے پی میں شامل ہونے کے چند گھنٹے بعد آیا ہے۔ جے ایم ایم کے مرکزی ترجمان سپریو بھٹاچاریہ نے یہاں ایک پریس کانفرنس میں کہا، ’’اپنے حربوں کے باوجود، بی جے پی اپنے مشن میں کامیاب نہیں ہوگی۔‘‘ جھارکھنڈ میں اگلی حکومت ہیمنت سورین کی قیادت میں بنے گی، اس سال کے آخر میں جھارکھنڈ میں اسمبلی انتخابات ہونے ہیں۔ چمپائی سورین کے بی جے پی میں شامل ہونے پر بھٹاچاریہ نے کہا کہ جب خاندان کا کوئی فرد چلا جاتا ہے تو دکھ ہوتا ہے۔ انہوں نے کہا، “چمپائی دا ہمارے رہنما رہے ہیں، جنہوں نے علیحدہ جھارکھنڈ ریاست کی تحریک میں کردار ادا کیا۔ پارٹی (جے ایم ایم) نے انہیں مکمل عزت اور احترام دیا اور ان کی قیادت کو بھی قبول کیا۔ وہ جہاں بھی جائیں، میں ان کے لیے نیک خواہشات پیش کرتا ہوں۔” جھارکھنڈ کے سابق وزیر اعلی چمپائی سورین جمعہ کو بی جے پی میں شامل ہو گئے۔ دو دن پہلے، انہوں نے پارٹی کے موجودہ کام کرنے کے انداز پر ‘بے اطمینانی’ اور ‘سخت توہین’ کا حوالہ دیتے ہوئے جے ایم ایم سے استعفیٰ دے دیا تھا۔