ہمیں ہر کھلاڑی پر فخر ہے، چاہے وہ کسی بھی ریاست سے تعلق رکھتا ہو: یوگی آدتیہ ناتھ

اتر پردیش کے وزیر اعلی یوگی آدتیہ ناتھ نے ہفتہ کو کہا کہ ہمیں ہر کھلاڑی پر فخر محسوس ہوتا ہے، چاہے وہ کسی بھی ریاست سے تعلق رکھتا ہو۔ کھلاڑی سب سے پہلے اور سب سے اہم ہندوستانی ہے اور پورے ملک کی نمائندگی کرتا ہے۔ یہاں جاری ایک سرکاری بیان کے مطابق، وزیر اعلی یوگی نے ہفتہ کو ’14ویں ہاکی انڈیا کانگریس’ کے موقع پر ‘ہاکی انڈیا’ کے عہدیداروں سے 5 کالی داس مارگ پر واقع اپنی سرکاری رہائش گاہ پر بات کی۔ ہاکی انڈیا کے عہدیداروں کا خیرمقدم کرتے ہوئے وزیر اعلیٰ نے کہا کہ ‘ہاکی انڈیا’ کی 14ویں کانگریس کا اتر پردیش میں انعقاد بہت ضروری ہے۔ انہوں نے کہا، “ہمیں ہر کھلاڑی پر فخر ہے، چاہے وہ کسی بھی ریاست سے تعلق رکھتا ہو۔ کھلاڑی سب سے پہلے اور سب سے اہم ہندوستانی ہے اور پورے ملک کی نمائندگی کرتا ہے۔” انہوں نے ہاکی انڈیا کے عہدیداروں سے توقع ظاہر کی کہ وہ عالمی معیار کے مطابق ملک کے لئے بہترین ہاکی ٹیم تیار کریں گے۔ کھلاڑیوں کو بہترین سہولیات فراہم کی جائیں گی۔ وزیراعلیٰ نے کہا کہ ہمیں کھلاڑیوں کے ذہنوں میں اپنائیت کا جذبہ پیدا کرنا ہوگا۔ یوگی آدتیہ ناتھ نے کہا کہ ریاستی حکومت کھلاڑیوں کی حوصلہ افزائی کی مہم میں ہاکی انڈیا کا ساتھ دینے کے لیے تیار ہے۔ ہاکی انڈیا کو ریاست کے محکمہ کھیل کے ساتھ مل کر مختلف اضلاع میں ہاکی کے لیے اسٹیڈیم بنانے کے امکانات پر کام کرنا چاہیے۔ وزیر اعلیٰ نے کہا کہ ہاکی ہندوستان کا قومی کھیل ہے۔ اس لیے ہر ہندوستانی کو ہاکی سے لگاؤ ​​ہے اور وہ ہاکی کے کھلاڑیوں اور ہاکی انڈیا سے وابستہ لوگوں کے لیے احترام کا جذبہ رکھتا ہے۔ ہندوستانی ہاکی ٹیم کے لیے اتر پردیش سب سے زیادہ زرخیز میدان رہا ہے۔ ہاکی کے جادوگر میجر دھیان چند کی پیدائش اتر پردیش میں ہوئی تھی۔ وزیر اعلیٰ نے ہاکی انڈیا کے عہدیداروں کو او ڈی او پی (ایک ضلع ایک پروڈکٹ) بھی پیش کیا۔ کھیل اور نوجوانوں کی بہبود کے وزیر مملکت (آزادانہ چارج) گریش چندر یادو نے بھی پروگرام سے خطاب کیا۔