ہندوستانی تاجروں کو موقع ملا تو چینی مصنوعات کو شکست دے سکتے ہیں: کیجریوال

دہلی کے وزیر اعلی اروند کیجریوال نے اتوار کو کہا کہ اگر ہندوستانی صنعت کاروں اور کاروباریوں کو حکومتی نظام اور عمل کو آسان بنا کر موقع دیا جائے تو وہ بین الاقوامی سطح پر چینی مصنوعات کو شکست دے سکتے ہیں۔ ‘چاندنی چوک شاپنگ فیسٹیول’ میں حصہ لیتے ہوئے، انہوں نے کہا کہ ان کی حکومت ‘دہلی شاپنگ فیسٹیول’ اور دہلی بازار جیسے اقدامات کے ذریعے شہر کے بازاروں کو بین الاقوامی سطح پر پہچان دے گی۔ کیجریوال نے کہا، “ہم بین الاقوامی سطح پر چینی مصنوعات کو مات دے سکتے ہیں لیکن تاجروں اور کاروباریوں کو موقع نہیں ملتا۔ حکومت ساتھی اور مددگار کے طور پر کام کرنے کی بجائے ہر کام میں رکاوٹیں کھڑی کرتی ہے۔ اگر حکومتی نظام کو آسان بنا کر ہمارے تاجروں اور صنعت کاروں کو مواقع فراہم کیے جائیں تو ہم بلا شبہ چین کو پیچھے چھوڑ سکتے ہیں۔